Zouti ki pou ede ou deside ki enfòmasyon ki verite ak ki enfòmasyon ki pa verite

Gen enfòmasyon sou kansè ki disponib nan plizyè sous. Kòman ou kapab deside kisa ki verite ak kisa ki pa verite? Souvan li konn difisil pou konnen ki enfòmasyon ki verite, ak ki sous enfòmasyon nou kapab fè konfyans. Men kèk zouti nou itilize pou deside si enfòmasyon nou jwenn yo fyab.

Evalye enfòmasyon nou jwenn sou entènèt

Pou anpil nan nou rezo sosyal ak lòt sous sou entènèt se resous ki gen valè epi yo pèmèt li fasil pou jwenn repons ak kesyon nou yo. Men yon rezime ki bay avantaj ak dezavantaj ki genyen lè nou itilize entènèt pou jwenn enfòmasyon sou sante nou:

Avantaj ak dezavantaj ki genyen lè yon moun itilize rezo sosyal pou jwenn enfòmasyon sou sante

Avantaj Dezavantaj

Li bay edikasyon ak konesans

 Moun kapab entèprete enfòmasyon yo mal
Li pèmèt nenpòt moun gen aksè ak enfòmasyon yo tousuit epi li pèmèt nou gen yon aksè dirèk enfòmasyon yo Sa kapab deranje èd ak konesans doktè yo ak lòt pwofesyonèl swen sante kapab bay
Li bay moun enfòmasyon sou fason pou prevwa kansè, dekouvri l bonè, epi jwenn enfòmasyon sou nouvo tretman yo Move enfòmasyon kapab lakòz moun viv mal, fè move prevansyon, oswa chwazi yon move tretman, epi li kapab lakòz domaj
Pèmèt pasyan yo pran responsabilite pou edike tèt yo Li kapab fè moun pa kwè doktè yo epi deranje relasyon ki gen ant pasyan yo ak pwofesyonèl swen sante yo
Li ede fè pwomosyon epi li sipòte itilizasyon estrateji prevantiv ak tretman yo Li kapab ogmante anksyete
Li bay pasyan yo mwayen pou edike moun ki nan anviwònman yo Kapab simaye move enfòmasyon

Nou adapte l apati: Welch-Cline et al. The Roles of Patients’ Internet Use for Cancer Information and Socioeconomic Status in Oncologist-Patient Communication, Journal of Oncology Practice, 2007 (Welch-Cline et al. Wòl Pasyan yo Jwe Nan Itilize Entènèt pou Jwenn Enfòmasyon sou Kansè ak Estati Sosyo-Ekonomik nan Kominikasyon ant Pasyan ak Onkològ li, Jounal sou Pratik Onkoloji, 2007).

Fè pwòp verifikasyon

Kòman ou kapab triye pil enfòmasyon sa yo epi chwazi sa ki egzak epi fyab la? Men kèk etap ou kapab konsidere:

Li pi lwen pase tit la: Li tout atik la pou w kapab wè kisa atik la di tout bon. Pa kouri kwè nan tit ki dramatik epi ki kapab choke.

Verifye:

Kiyès ki ekri l?
Èske otè a gen kalifikasyon, epi èske nou konn repitasyon l? Ki lòt travay li ap fè? Kiyès ki peye l? Èske li ap eseye vann yon bagay?

Kiyès ki pibliye l?
Èske esponnsò enfòmasyon an se yon moun nou konnen epi nou kapab fè konfyans? Èske enfòmasyon an sòti nan yon konpayi ki pa la pou fè pwofi? (Gade nan lis ki bay sous ki fyab yo)

Èske se yon verite oswa yon opinyon?
Èske otè a gen ekspètiz ki legal nan domèn lan? Èske li prezante done oswa èske atik la santre sou opinyon? Èske li site sous ki fyab? (Gade nan lis ki bay sous ki fyab yo)

Èske atik la resan?
Atik ki pa resan yo ka gen enfòmasyon ki pa ajou. Si ou pa sèten, chèche atik ki pi resan.

Èske se yon fwod?
Èske enfòmasyon an mennen w sou sit yon twazyèm pati? Èske yo mande w pou ou achte yon bagay oswa pou ou bay enfòmasyon pèsonèl? Èske se yon piblisite ki esponnsorize oswa èske se yon piblisite?

Verifye de (2) fwa: Verifye deklarasyon ki gen nan atik la pandan ou ap chèche yon dezyèm sous enfòmasyon ki endepandan epi ki fyab. (Gade nan lis ki bay sous ki fyab yo)

Estil ekriti: Pa dwe gen erè gramatikal oswa fot òtograf. Sa ki ekri a dwe gen yon estil ki klè epi li dwe revize yon fason pwofesyonèl.

Lis verifikasyon CARE

Lis verifikasyon CARE la se yon lòt fason pou detèmine ki sous ki fyab ak ki sous ki pa fyab:

Fè CARE (ATANSYON) lè ou ap gade enfòmasyon yo:

Deklarasyon

Èske deklarasyon an sanble ak yon eskandal, èske li gen enfòmasyon ki twò konplike, èske li pale prensipalman sou remèd natirèl, epi èske li gen delè ki fo (yo rive twò rapid pou sanble verite)?

Akseptab

Verifye deklarasyon an avèk lòt sous moun respekte. Gade atravè enfòmasyon an pou wè nenpòt erè gramatikal ak fot òtograf. Atik pwofesyonèl yo gen yon estil ki klè epi li dwe revize yon fason pwofesyonèl. Èske sit entènèt la oswa atik la estriktire? Èske otè a sanble gen lòt atik li ekri ki gen bon repitasyon?

Demann

Èske sit entènèt la oswa sous la mande moun ki ap li a pou li achte kèk pwodui (tankou sipleman, remèd natirèl, remèd), fè don, oswa fè yon peman sou sit entènèt lan? Pa ale sou sit entènèt yon twazyèm pati lè sous la mande w fè sa, epi pa janm bay enfòmasyon pèsonèl ou.

Prèv

Èske otè a verifye deklarasyon li an pandan li ap itilize sous moun kapab fè konfyans? Èske li site epi li mete kote li te jwenn tout enfòmasyon sa yo? (Sous fyab yo ka fini avèk .edu oswa .gov epi li gen ladan l lopital ak lòt sit entènèt ki se .org.)